Joriy yilda viloyatda yetishtirilgan paxta hosilini yig‘ib-terib olishga jalb etilgan terimchilarga qulay shart-sharoitlar yaratish va mehnatini muhofaza qilish, ularga o‘z vaqtida sifatli oziq-ovqat mahsulotlarini yetkazib berish, terimchilar uchun yaratilgan yotoq sharoitlari hamda o‘rnatilgan tartibda terim pullarining berilishi ustidan jamoatchilik nazoratini tashkil etish maqsadida viloyat kasaba uyushmalari tashkilotlari birlashmasi kengashi rayosatining 2017 yil 28 avgustda 9-19 “s” sonli qarori qabul qilindi.
Mazkur qarorga binoan 2017 yil paxta yig‘im-terimi mavsumida tumanlarda terimchilar uchun yaratilayotgan shart-sharoitlarni o‘rganish, aniqlangan kamchiliklarni mutasaddi idoralar bilan hamkorlikda bartaraf etilishini ta’minlash maqsadida viloyat kasaba uyushmalari tashkilotlari birlashmasi kengashi apparati xodimlari hamda tarmoq kasaba uyushmalari respublika Kengashlarining viloyatdagi mas’ul tashkilotchilaridan iborat Ishchi guruhlari tuzildi.
Mavsum boshidan buyon ishchi guruh tomonidan paxta hosilini yetishtiradigan tumanlardagi fermer xo‘jaliklariga qarashli 370 dan ortiq dala shiyponlari, “Mehnat-rohat” palatkali shaharchalar va moslashtirilgan binolarda terimchilarga yaratilgan mehnat va maishiy sharoitlar, tibbiy xizmat va dori-darmon ta’minoti, madaniy-ma’rifiy ishlarning tashkil etilishi hamda terim pullarining o‘z vaqtida berib borilishi ahvoli o‘rganilib joriy yilning sentabr oyidan boshlab har haftada viloyat hokimligiga tahliliy ma’lumot kiritib borilmoqda va aniqlangan kamchiliklar viloyat Paxta shtabi orqali barcha tuman hokimliklariga yetkazilib, mavjud kamchiliklar o‘z vaqtida bartaraf etilishiga erishilmoqda.
Shuningdek, viloyat kasaba uyushmalari tashkilotlari birlashmasi kengashi tomonidan 2017 yil paxta hosilini yig‘ib-terib olishda mehnat muhofazasi va xavfsizlik texnikasi qoidalariga rioya etish, terim ishtirokchilari uchun sanitar-maishiy sharoitlarning yaratilishi bo‘yicha Tavsiyalar ishlab chiqilib, barcha terim otryadlari rahbarlariga yetkazildi va ushbu Tavsiyalar asosida terimchi va hasharchilar uchun o‘rnatilgan miqdorda sifatli oziq-ovqat mahsulotlari yetkazib berilishi, ularning issiq ovqat hamda ichimlik suvi bilan ta’minlanishi, terimda ishtirok etayotgan xotin-qizlar uchun gigiyena xonalarining tashkil etilishi, terimchilar uchun barcha sanitar va mehnat muhofazasi talablariga javob beradigan shart-sharoitlarning yaratilishi ustidan jamoatchilik nazorati o‘rnatildi.
Terimda ishtirok etayotgan hasharchilar va terimchilar uchun dala shiyponlari, “Mehnat-rohat” palatkali shaharchalar va moslashtirilgan binolar kerakli tibbiyot vositalari va dori-darmonlar bilan ta’minlandi. Bir nafardan ichki ishlar va tibbiyot xizmati xodimi biriktirildi.
Fermer xo‘jaliklari tomonidan terimda ishtirok etayotgan hasharchi va terimchilar uchun har kuni tushlikda bepul go‘shtli ovqat (palov, shovla) tashkil etilmoqda. Ertalabki nonushta uchun har bir terimchi va hasharchilarga qo‘shimcha ravishda bittadan pirojki, tuxum va 20 grammdan sariyog‘ bepul berilmoqda. Shuningdek, viloyatning Mirishkor, Qarshi, Yakkabog‘, Kasbi, Qamashi, Chiroqchi, Nishon, Koson, G‘uzor va Muborak tumanlarida 50 kilogrammdan oshirib paxta tergan terimchilarga 1 litrdan paxta yog‘i dalaning o‘zida tarqatilmoqda.
Joriy yilning 17 oktabridan boshlab terimchilarga qo‘lda terilgan bir kilogramm paxta uchun viloyatning Mirishkor, Kasbi, Nishon va Koson tumanlarida 800 so‘mdan, Qarshi, Shahrisabz, Qamashi, Yakkabog‘, Chiroqchi, Muborak va G‘uzor tumanlarida 700 so‘mdan terim pullari belgilanib o‘z vaqtida tarqatilmoqda.
Viloyat hokimining tavsiyasi asosida paxta hosilini nes-nobud qilmasdan toza terish bo‘yicha viloyat kasaba uyushmalari tashkilotlari birlashmasi kengashi hamda “Nuroniy” jamg‘armasi viloyat bo‘limi tomonidan paxta hosilini terimchilar va hasharchilar tomonidan bir chigit qilib termaslik, dala chetlariga to‘kmaslik, paxta o‘lchash maydonchalarini ozoda tutish bo‘yicha targ‘ibot va tashviqot ishlari olib borilmoqda.
